Ըստ Աղվան Վարդանյանի` Ներսես Երիցյանը պետք է տարրական գրագիտություն ունենա

Այսօր ԱԺ արտահերթ նիստում ԿԲ նախագահի տեղակալ Ներսես Երիցյանը, իր եզրափակիչ ելույթում խոսելով պարտադիր կուտակային համակարգի մասին, կարծիք հայտնեց, որ ռեֆորմին դեմ արտահայտվող Դաշնակցությունը ցանկանում է ամեն ինչ ազգայնացնել, այդ թվում` տնտեսությունը, սակայն, Երիցյանի խոսքով, այդպես չի լինում:

Նրա հայտարարությանն ի պատասխան, ԱԺ ՀՅԴ խմբակցության քարտուղար Աղվան Վարդանյանը նշեց, որ երբ խոսք է գնում պետականության ու պետության հեղինակության մասին, ապա դրանք վերացական հասկացություններ չեն, քանի որ պետությունը նաև մարդիկ են, պետական բարձրաստիճան պաշտոնյաները, այդ թվում` նաև էկոնոմիկայի նախկին նախարար, այժմ` ԿԲ նախագահի տեղակալ Ներսես Երիցյանը:

«Եթե այդ պաշտոնները զբաղեցնող մարդը տեղյակ չէ Դաշնակցության ծրագրի տնտեսական գաղափարախոսությանից , դա պետականության վարկաբեկում է: Մարդ, ով զբաղեցրել և զբաղեցնում է բարձր պաշտոններ, ուղղակի պարտավոր է տարրական գրագիտություն ունենալ և տիրապետել Հայաստանում գործող քաղաքական կուսակցությունների գաղափարախոսությանը»,- ասաց Աղվան Վարդանյանը: