ՄՄ-ին Հայաստանի անդամակցությունը Ռուսաստանի վրա 1 միլիարդ դոլար կնստի

Մաքսային միությանը  Հայաստանի անդամակցության դեպքում Ռուսաստանը տնտեսական որոշ կորուստներ կունենա: Այդ կորուստները հաշվարկված են եւ կազմում են մոտ 1 մլրդ դոլար. այսօր կայացած` Երեւան-Մոսկվա տեսակամրջի ժամանակ ասաց ՌԳԱ Եվրոպայի ինստիտուտի ԱՊՀ երկրների Ռազմավարական զարգացման կենտրոնի ղեկավար, պրոֆեսոր Ալեքսանդր Գուսեւը։ 

«Այդ կորուստները գնահատվում են մոտ 1 միլիարդ դոլար, եթե հաշվի առնենք մաքսային տուրքերի զրոյացումը, գազի գնի նվազումը, Հայաստանում կատարվելիք ներդրումները եւ այլն»,-  նշեց բանախոսը:

Բայց այս ամենի փոխարեն, ըստ Գուսեւի, Ռուսաստանը շատ ավելին է ստանում, հատկապես` քաղաքական դիվիդենդների եւ ուժերի զուգորդման տեսանկյունից: Այնպես որ` Մաքսայան միությանը Հայաստանի անդամակցությունը փոխշահավետ է:

Փորձագետի դիտարկմամբ` Հայաստանի համար Մաքսային միությանն անդամակցելը կարեւոր էր նաեւ անվտանգության ապահովման առումով:

Այս կապակցությամբ հայկական կողմից քաղաքագետ Ալեքսանդր Մարկարովը նշեց, թե հայ-ռուսական ռազմատեխնիկական համագործակցությունը եւ Հայաստանում ռուսական ռազմակայանի տեղակայումը որքան ձեռնտու եւ կարեւոր է Հայաստանի համար, նույնքան էլ պետք է ու կարեւոր է Ռուսաստանի համար: Քաղաքագետը կոչ արեց քաղաքական կոռեկտություն ցուցաբերել այս հարցում, առավել եւս, որ հայ-ռուսական հարաբերությունները փոխշահավետ են: