Ինչո՞ւ էր Գալուստ Սահակյանը ասում, թե գազի պարտք չունենք

ԱԺ ավանդական ճեպազրույցում ԱԺ ՀՀԿ խմբակցության ղեկավար Գալուստ Սահակյանից լրագրողները հետաքրքրվեցին, թե ե՞րբ են իմացել գազի գնի պարտքի մասին: Պարզվում է` Սահակյանը թվային տվյալների չի տիրապետում:

«Չգիտեմ, բայց այս ընթացքում, որպեսզի մեղմվի գազի գինը բնակիչների համար, միջոցառումների փոփոխություններ ենք արել, որ սոցիալական խավին աջակցենք: Այդ ընթացքում պարտք է կուտակվել, թե դա 100 միլիոն է, թե` 200, ես հստակ չգիտեմ, բայց գիտեի, որ պարտքեր են կուտակվել»,- ասաց նա:

Սահակյանը համոզված է, որ եթե չլինեին բանակցությունները ռուսական կողմի հետ, գազի գինը կլիներ 200 դրամից ավելի: Դիտարկմանը, որ թեեւ ասել էր, թե Պուտինի այցի արդյունքը կլինի գազի գնի նվազումը, այնինչ Վիգեն Սարգսյանն ու Արմեն Մովսիսյանը հայտարարեցին, որ գազի գնի նվազում չի սպասվում, Սահակյանը պատասխանեց, թե այդպես է ասել, որովհետև իր քաղաքական վերլուծությունը տանում էր դրան:

«Ես նկատում եմ, որ գազի գնի նվազում կլինի, որովհետև ես տեսնում եմ էն ռազմավարությունը ու քայլերը, որ կատարում է Ռուսաստանը, տանում է դրան: Նաև ռուսական կողմից հայտարարություն եղավ, որ գազի գինը Հայաստանի քաղաքացիների համար հաշվարկվելու է Ռուսաստանի ներքին սակագներով: Կարծում եմ` Ռուսաստանը մեղմ քաղաքականություն կկիրառի` գազի գնի հետ կապված: Հետո նաև աշխատավարձերի բարձրացումը կնպաստի, որ քաղաքացիների մոտ գազի գնի հետ կապված խնդիրը վերանա, ու նրանք նորմալ կարողանան օգտվել գազից»,- նշեց Սահակյանը: