''Միացյալ խաչ''-ի տեղադրման որոշումը անցած տարվա ապրիլի՞ն է կայացվել

 Այսօր շաբաթ է` ոչ աշխատանքային օր, և եթե քաղաքապետարանի տեղեկատվության և հասարակայնության հետ կապերի վարչության պետը աշխատում է, դա դեռ չի նշանակում, որ պետք է պատասխանի լրագրողների հարցերին: Այս մասին Yerkir.am-ի հետ զրույցում ասաց քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը` պատասխանելով Նալբանդյան փողոցում արձանի տեղադրման որոշման վերաբերյալ մեր հարցին:

Ինչպես ավելի վաղ հայտնել էր Yerkir.am-ը, Նալբանդյան փողոցում տեղադրվել է «Միացյալ խաչ» անունը կրող հուշարձան, որը պետք է բացի Վլադիմիր Պուտինը` դեկտեմբերի 2-ին:

«Թե երբ է կայացվել արձանի տեղադրման որոշումը, ես չեմ կարող ասել, որովհետև այսօր աշխատանքային օր չէ: Երբ կկայանա արձանի պաշտոնական բացման արարողությունը, այն ժամանակ էլ լրատվամիջոցները կարող են հարցեր ուղղել արձանի վերաբերյալ: Իսկ առայժմ ձեր հարցերն ուղարկեք գրավոր»,- ասաց Արթուր Գևորգյանը:

Ավելի ուշ, չնայած այսօր շաբաթ օր է, քաղաքապետարանի տեղեկատվության և հասարակայնության հետ կապերի վարչության պետի տեղակալ Արթուր Սարուխանյանը զանգահարեց խմբագրություն եւ հայտնեց, որ արձանի տեղադրման որոշումը կյանքի է կոչվել 2012թ. ապրիլի 27-ին`  քաղաքապետի կողմից: