Պայմանագրային զինծառայողների աշխատավարձը չի բարձրացել

Այսօր 2014թ. բյուջեի քննարկումների ժամանակ ՀՅԴ խմբակցության պատգամավոր Արծվիկ Մինասյանը հարց ուղղեց ԱԺ պաշտպանության, ներքին գործերի և անվտանգության հարցերի մշտական հանձնաժողովի նախագահ Կորյուն Նահապետյանին:

Նա հետաքրքրվեց` արդյոք ավելանալո՞ւ է պայմանագրային զինծառայողների թիվը, կստեղծվե՞ն, արդյոք, հնարավորություններ պաշտպանության համակարգում սփյուռաքահայ հայրենակիցներին ու կանանց ներգրավելու համար, կբարձրանա՞ն, արդյոք, պայմանագրային զինծառայողների աշխատավարձերը:

Կորյուն Նահապետյանը նշեց, որ զինված ուժերի համալրումն իրականացվում է զինակոչի միջոցով, և գործող օրենքը չի նախատեսում ներգրավել սփյուռքահայերին ու կանանց: Ինչ վերաբերում է պայմանագրային զինծառայողների աշխատավարձերի բարձրացմանը, վարձատրության չափը բյուջեի նախագծով չի փոխվել: Նա հավելեց, որ պայմանագրային զինծառայողների թիվն ավելանում է: