Հաշվարկային առումով` գրեթե անհնար է, որ տրանսպորտը չթանկանա

Տրանսպորտի թանկացումը, բնականաբար, կազդի սոցիալապես անապահով խավի վրա, բայց  Yerkir.am-ի հետ զրույցում, խոսելով տրանսպորտի թանկացման մասին, Հայաստանի պետական ֆիլհարմոնիկ նվագախմբի տնօրեն, Երեւանի ավագանու անդամ Ռուզաննա Սիրունյանը հույս հայտնեց, որ աջակցման կարիք ունեցողների` ուսանողների, թոշակառուների համար ինչ-որ վերապահումներ կարվեն:

Նա նշեց նաեւ, որ ստեղծվել է հանձնաժողով` մասնագետներից, ավագանու անդամներից, ինչպես նաեւ ՀԿ-ների նախագահներից կազմված: «Հարցը քննարկման փուլում է: Վերջին նիստը երկու օր առաջ է եղել, եւ այդ տվյալներով` դեռ որոշում չկա: Եթե հնարավորություն լինի չթանկացնելու, իհարկե, լավ կլինի: Բայց ես, որքանով տեղեկացված եմ, հաշվարկային առումով գրեթե անհնար է, որ չթանկանա»,- ասաց Սիրունյանը` հավելելով, որ այն, ինչ ժողովրդին դեպի լավը կտանի, ինքը դրան է կողմնակից: