ՀԱԿ ակտիվիստների գործը դարձյալ կբողոքարկվի

Մոտ օրերս ՀԱԿ ակտիվիստների պաշտպանները կդիմեն ՀՀ Վճռաբեկ դատարան` բողոքարկելու Վերաքննիչ քրեական դատարանի` հոկտեմբերի 14-ի վճիռը: Այս մասին yerkir.am-ին հետ  հայտնեց ակտիվիստների պաշտպան Մուշեղ Շուշանյանը` նշելով, որ օրեր առաջ են ստացել Վերաքննիչ դատարանի կայացրած ակտը, իսկ այժմ պատրաստում են համապատասխան փաստաթղթերը` գործը բողոքարկելու համար:

Համաձայն ՀՀ քրեական դատավարության օրենսգրքի 412 հոդվածի 1-ին մասի` վճռաբեկ բողոքը կարող է բերվել վերաքննիչ դատարանի` գործն ըստ էության լուծող դատական ակտի դեմ հրապարակման պահից մեկամսյա ժամկետում, իսկ գործն ըստ էության չլուծող դատական ակտերի դեմ` այդ ակտը ստանալու պահից 15-օրյա ժամկետում, եթե օրենքով այլ բան նախատեսված չէ:

Հիշեցնենք, որ Վերաքննիչ դատարանը` դատավոր Եվա Դարբինյանի նախագահությամբ, որոշում էր կայացրել ՀԱԿ ակտիվիստ Տիգրան Առաքելյանի շահերի պաշտպան Վահե Գրիիգորյանի, ամբաստանյալներ Սարգիս Գևորգյանի, Արտակ Կարապետյանի, Դավիթ Քիրամիջյանի վերաքննիչ բողոքները մասնակիորեն բավարարել:

ՀԱԿ ակտիվիստների գործը մեկ անգամ արդեն գտնվել է Վճռաբեկ դատարանի վարույթում. ՀՀ Վճռաբեկ դատարանը, 2013 թվականի մայիսի 8-ի որոշմամբ, մասնակիորեն բավարարել էր ամբաստանյալ Տ.Առաքելյանի պաշտպան Վ.Գրիգորյանի, ամբաստանյալներ Ա.Կարապետյանի, Ս.Գևորգյանի և Դ.Քիրամիջյանի վճռաբեկ բողոքները` բեկանել ՀՀ վերաքննիչ քրեական դատարանի 2012 թվականի նոյեմբերի 13-ի որոշումը և գործն ուղարկել նույն դատարան` լրացուցիչ քննության: