Գործազրկության նպաստ ստացողները պորտաբույծնե՞ր են

Հասարակությունը պարտավոր չէ պորտաբույծներին պահել. այսօր լրագրողների հետ հանդիպման ժամանակ, անդրադառնալով գործազուրկներին 18 հազար դրամ նպաստից զրկելու օրենքի նախագծին, հայտարարեց ԱԺ ՀՀԿ-ական պատգամավոր Մանվել Բադեյանը: Նրա խոսքով` նպաստների ինստիտուտը, որպես այդպիսին, ոչ թե վերացվել է, այլ նույն միջոցներն ուղղվել են նոր աշխատատեղերի ստեղծմանը և մասնագետների վերապատրաստմանը:

ԱԺ «Ժառանգություն» խմբակցության պատգամավոր Անահիտ Բախշյանը, թեև կողմ է գործազրկության նպաստը վերացնող օրինագծի գաղափարին, սակայն համարում է, որ Բադեյանի նշած պորտաբույծներին «մեծացրել է» մեր կառավարությունը:

«Այդ պարազիտին իրենք են մեծացրել: Այն, որ այդ գումարը ստացողների 94%-ը դրա կարիքը չեն ունեցել, և կառավարությունն անարդյունավետ ծախսեր է արել, մեր կառավարման համակարգի հերթական աղետն է»,- մեկ այլ ասուլիսի ժամանակ հայտարարեց Բախշյանը:

Սակայն «Ժառանգության» պատգամավորը մտավախություն ունի, որ գործազուրկներին հատկացվող  18 հազար դրամը, որն օրենքի նախագծով վերացվելու է, չի ուղղվի ճիշտ նպատակին: Այդ իսկ պատճառով պատգամավորը կասկածի տակ է դնում այն մեխանիզմները, որոնցով կառավարությունը մտադիր է իրագործել նախագիծը: