Գալուստ Սահակյանը սիրո, լիրիկայի ճանապարհով չգնաց

ԱԺ ՀՀԿ խմբակցության ղեկավար Գալուստ Սահակյանի կարծիքով` գլխավոր դատախազի թեկնածու Գեւորգ Կոստանյանը դրական է ընկալվում ԱԺ բոլոր խմբակցությունների կողմից: Այս մասին նա հայտնեց ԱԺ ՀՀԿ խմբակցության դիրքորոշումը Կոստանյանի թեկնածության վերաբերյալ ներկայացնելու ժամանակ` հավելելով, որ Կոստանյանը լուրջ քննարկումներ է ունեցել բոլոր խմբակցությունների հետ:

Ըստ Սահակյանի` Կոստանյանից ստացած դրական տպավորությունն իրականությանը համապատասխանում է: «Գեւորգ Կոստանյանը լուրջ ձայներ կստանա, որովհետեւ մյուս խմբակցություններն էլ են այդպես ցանկանում: Ոչ պետք է հոտ քաշել, ոչ էլ` հոտել, զազրախոսությունը բնավ հաճելի չէ որեւէ մեկի համար»,- նշեց Սահակյանը` ընդգծելով, որ ճիշտ ճանապարհ չէ մատնանշելը, թե ինչ թերություններ ունի թեկնածուն:

Պատգամավորը վստահ է, որ բարեփոխումների ընդհանուր ծրագրում Կոստանյանը մեծ դերակատարում կունենա: «Ես չեմ ուզում մոնումենտալ, սիրո, լիրիկայի ճանապարհով գնալ, բայց մի բան ուզում եմ նշել` ես բարեկրթություն եմ որսացել Կոստանյանի մեջ, իսկ բարեկրթությանը ձայն տալը նշանակում է ապագա ունենալ»,- ասաց Սահակյանը: