ԵՊՀ շենքի առջեւ լարված իրավիճակ է

ԵՊՀ կենտրոնական մասնաշենքի առջեւ ակցիա իրականացնող ուսանողներին քիչ առաջ միացան Ազատության հրապարակում նստացույց իրականացնող ազատամարտիկները, ինչպես նաեւ ԵՊՀ դասախոս, կենսաքիմիայի մասնագետ Անի Զախարյանը: Վերջինս նշեց, որ եթե ուսանողները ճանապարհի կեսից հետ չեն կանգնելու եւ պայքարելու են մինչեւ վերջ, ինքը պատրաստ է պայքարել նրանց հետ:

Ոստիկանները թույլ չեն տալիս ազատամարտիկներին եւ ուսանողներին բարձրանալ աստիճանահարթակներին` բոլոր հարցումներին պատասխանելով, թե` ինչո՞ւ չեք ենթարկվում ոստիկանների օրինական պահանջներին: Նրանք թույլ չեն տալիս նաեւ խոսել բարձրախոսով` պատճառաբանելով, թե խանգարում են ուսումնական գործընթացին, իսկ դասամիջոցներին էլ` դասախոսների կենտրոնանալուն: Ակտիվիստ Հարություն Մկրտչյանին ոստիկանները զգուշացրել են, որ եւս մեկ անգամ բարձրախոսից օգտվելու դեպքում կհրավիրեն ոստիկանություն: