Եթե հակված եք հավատալու էդ ասողին` խնդիր չկա. Սպիտակի քաղաքապետը` քաղաքացուն ծեծի ենթարկելու մասին

Լոռու դատախազությունը քրեական գործ է հարուցել Սպիտակի քաղաքապետ Գագիկ Սահակյանի նկատմամբ՝ քաղաքացու կողմից ստացված ահազանգի հիման վրա։ 

«Փաստինֆո»-ի տեղեկություններով` Լոռու  Սպիտակ քաղաքի բնակիչ Լեւիկ Մարյանը հաղորդում է ներկայացրել իրավապահներին, որ երեկ` ժամը 13-ի սահմաններում, Սպիտակ քաղաքի Տեր-Սիմոնյան փողոցում կենցաղային հարցերի շուրջ առաջացած վիճաբանության ընթացքում Սպիտակի քաղաքային համայնքի ղեկավար Գագիկ Սահակյանը  ծեծել է իրեն։  Հաշվի առնելով, որ  հաղորդման մեջ առկա են հանցագործության հատկանիշներ, դատախազությունը քրեական գործ է հարուցել ՀՀ քրեական օրենսգրքի 118-րդ հոդվածով։   Քրեական գործով նախաքննությունն իրականացնում է Լոռու մարզի քննչական բաժինը։  

Yerkir.am-ի հետ զրույցում Սպիտակի քաղաքապետ Գագիկ Սահակյանը մանրամասներ պատմեց, իր բնորոշմամբ, թեթևակի վիճաբանության վերաբերյալ: Քաղաքապետի խոսքով` իրենք պետության միջոցներով  լավ գործ են ձեռնարկել` ասֆալտապատելու են և ջրահեռացման գծեր են տեղադրելու Սպիտակից Արևաշող տանող ճանապարհին: Սակայն  ծրագրի իրականացման ընթացքում  հողը փակել է մի քանի բնակիչների ոռոգման ջրի առուն, և բնակիչներն իրեն խնդրել են միջամտել, որպեսզի խնդիրը լուծի և իրենց բերքը չջրելու հետևանքով չփչանա:

«Գնացել էի` տեղում նայելու: Էդ մարդը` Լևոնը (նկատի ունի տուժող Լևիկ Մարյանին), եկավ, իրան  ըսկի չեմ էլ ճանաչում, ավել-պակաս խոսեց, թե սրանք ո՞վ են, սրանք ի՞նչ հարց պետք է լուծեն և այլն: Ես էլ  կանչեցի, ասի` հլը արի, տեսնեմ` ի՞նչ ես ասում: Չեկավ:  Նա հայհոյում էր ինձ,  ես էլ մոտեցա,  ընդամենը թևից բռնեցի, ասացի`  նստի ավտոդ, գնա'»:

Հարցին, թե, այնուամենայնիվ, ծեծե՞լ է քաղաքացուն, Սպիտակի քաղաքապետը պատասխանեց. «Եթե հակված եք հավատալու էդ ասողին,  խնդիր չկա»: Նա  հայտնեց նաև, որ քննչական մարմիններն այս գործով արդեն իրեն հարցաքննել են, և որ ինքը սպասում է պատասխանին:

Հարցին`  ինչո՞ւ իրեն վիրավորելու համար  չի դիմել իրավապահ մարմիններին, քաղաքապետը պատասխանեց. «Եթե  ես չեմ տվել դատախազություն, նշանակում է` տվո՞ղն է ճիշտ: Ես ամեն մի բանի համար հո չեմ դիմի դատախազություն, գնամ, ասեմ` ինձ վիրավորե՞լ են, ամոթ չի՞: Ես ո'չ ծեծել եմ, ո'չ էլ, պարզապես մարդն անվստահություն էր հայտնում մեր կազմակերպության նկատմամբ  և մի մարդու, ով 95 %-ով քաղաքապետ է ընտրվել»: