Ունիվերսիադային կմասնակցի 40 հայ մարզիկ

Ռուսաստանի Կազան քաղաքում հուլիսի  6-17-ը տեղի կունենան համաշխարհային ուսանողական 27-րդ խաղերը: Դրանք ներառելու են 27  մարզաձև:

Սպասվում է, որ  մրցավայր  կժամանեն  170 երկրների 13 հազար ուսանող մարզիկ-մարզուհիներ: Նրանք կպայքարեն մեդալների  350 հավաքածուի համար:

Հայաստանը նույնպես կներկայացնի իր պատվիրակությունը`  շուրջ 40 մարզիկներով: Նրանք կներկայացնեն ազատ և հունահռոմեական ըմբշամարտ, բռնցքամարտ, ծանրամարտ, սամբո, ձյուդո, գոտիներով ըմբշամարտ, շախմատ, լող և աթլետիկա մարզաձևերը. տեղեկացնում է ՀԱՕԿ լրատվության բաժինը:

Խաղերին մասնակցելու են օլիմպիական խաղերի մրցանակակիրներ, հունահռոմեական ըմբիշներ  Արսեն Ջուլֆալակյանը, Արթուր Ալեքսանյանը, Եվրոպայի և աշխարհի առաջնությունների մեդալակիրներ, ազատ ոճի ըմբիշ  Դավիթ Սաֆարյանը, բռնցքամարտիկներ Կորյուն  Սողոմոնյանը, Արթուր Քիրաջյանը, ծանրորդներ Սմբատ Մարգարյանը, Աղասի Աղասյանը, շախմատիստներ Զավեն Անդրիասյանը,  Սամվել Տեր-Սահակյանը և այլք:

Մինչ ունիվերսիադայի մեկնարկը ուսանող-մարզիկները ուսումնամարզական հավաքներ կանցնեն:

Համաշխարհային ուսանողական խաղերն առաջին անգամ անցկացվել են 1959-ին Թուրինում: Նախկին ԽՍՀՄ-ում միջոցառումը հյուրընկալվել է 1973-ին: