″Հայկական ռապսոդիան″ կցուցադրվի Սան Պաուլոյի կինոթատրոններում

«Ոսկե ծիրան 2012» Երեւանի միջազգային կինոփառատոնի «Հայկական համայնապատկեր» ծրագրում ներկայացված «Հայկական ռապսոդիա» ֆիլմը, որն արժանացավ Բրիտանական խորհրդի հատուկ մրցանակին, շուտով կցուցադրվի Բրազիլիայի ամենամեծ քաղաքներից մեկի` Սան Պաուլոյի կինոթատրոններում: Այս մասին yerkir.am-ի հետ զրույցում նշեց ֆիլմի ռեժիսոր Գարի Կանանյանը:

Ըստ նրա` «Ոսկե ծիրանին» մասնակցելուց հետո ֆիլմը մի շարք հաջողություններ է ունեցել եւ ցուցադրվել կարեւոր միջազգային կինոփառատոներում:

«Հետագայում` Տորոնտոյում կայացած «Նուռ» միջազգային կինոփառատոնին ֆիլմն արժանացավ «Լավագույն վավերագրական ֆիլմ» կոչմանը: Այն մասնակցել է նաեւ Հոլիվուդում կայացած «ԱՐՓԱ» միջազգային կինոփառատոնին, ինչպես նաեւ Սան Պաուլոյում անցկացվող միջազգային կինոփառատոնին»,- ասաց Կանանյանը:

Ըստ նրա`  հանդիսատեսին հիմնականում դուր է գալիս ֆիլմը, եւ նա միշտ արձագանքում է, անգամ` Սան Պաուլոյի Դաշնային համալսարանի` իր քննադատական հայացքներով հայտնի հանդիսատեսը: Կանանյանի հավաստմամբ` շատերն ասում էին, որ պատկերացում անգամ չունեին, թե ինչ գեղեցիկ երկիր է Հայաստանը, եւ ոմանք ցանկություն են հայտնում այցելել Հայաստան. «Կարծում եմ` ֆիլմը դիտելուց հետո Հայաստանի մասին /որի գոյության մասին նրանք անգամ չեն էլ լսել/ մարդիկ լավ կարծիք են կազմում: Այն նաեւ ավելացնում է Հայաստանի հանդեպ համակրանքը»:

Կանանյանն այժմ զբաղված է խիստ կարեւոր մի գործով` հերթական կինոնկարի սցենարն է գրում, որը վերջում դառնալու է վավերագրական ֆիլմ Արցախի մասին:

Ի դեպ, «Հայկական ռապսոդիա» վավերագրական ֆիլմը Բրիազիլիան ներկայացնող երեք հայ ռեժիսորների համատեղ աշխատանքն է: Սա Կասիանա Տեր-Հարությունյանի, Սեզար Կանանյանի եւ Գարի Կանանյանի առաջին լիամետրաժ ֆիլմն է: Հեղինակներն իրենց ֆիլմը բնորոշել են «ճանապարհային», որի հերոսների պատմությունները, միաձուլելով, կերտում են մեկ ընդհանուր` Հայաստանի պատմությունը: