Կարկտաբեր ամպերը ցրելու հարցում Հայաստանը համագործակցո՞ւմ է Թուրքիայի հետ

Արդեն տեղեկացրել ենք, որ ԱԺ մշտական հանձնաժողովներում սկսվել են «ՀՀ 2012թ. պետական բյուջեի կատարման մասին» տարեկան հաշվետվության քննարկումները:

ԱԺ պաշտպանության, ազգային անվտանգության եւ ներքին գործերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում ԱԻ փոխնախարար Հայկարամ Մխիթարյանին ուղղված հարցերը հիմնականում վերաբերում էին վերջերս տեղի ունեցած ուժգին կարկուտին: «Ժառանգություն» խմբակցության պատգամավոր Ալեքսանդր Արզումանյանի հարցը եւս այդ թեմայով էր:

Նա փոխնախարարից մասնավորապես հետաքրքրվեց, թե փորձ արվե՞լ է մեր ԱԳՆ-ի միջոցով Թուրքիայի համապատասխան ծառայությունների հետ համագործակցել, որպեսզի կարկուտի ամպերը Թուրքիայից չներթափանցեն մեզ մոտ: Մխիթարյանը պատասխանեց, որ համագործակցության փորձեր Թուրքիայի հետ չեն արվել:

«Սովետական միության ժամանակ հրանոթներով էինք պայքարում այդ կարկտաբեր ամպերի դեմ: Ասում են՝ շատ հաճախ կրակում էին Թուրքիայի սահման, եւ եղել են դեպքեր, որ դժգոհել են, բողոքել են: Բայց հիմա մենք այդ հրանոթները չունենք` պատերազմի ժամանակ բոլորը գնացին ճակատ, եւ ոչ էլ կարող ենք Թուրքիայի օդային տարածքում կրակել: Ուզած-չուզած մեր պաշտպանական գոտիները պետք է շատացնենք»,- ասաց փոխնախարարը: