Կուրղինյանը քաղաքագետների համար ընդամենը տեղեկատու է

Քաղաքագետ Սերգեյ Կուրղինյանին Հայաստան հրավիրելու վերաբերյալ վերջին շրջանում մամուլում տարբեր հայտարարություններ են շրջանառվում, քննարկվում են նրա հայտարարությունները:

Այսօր լրագրողների հետ հանդիպման ժամանակ Հայաստանի քաղաքագետների միության նախագահ Հմայակ Հովհաննիսյանը հայտարարեց, որ ճիշտ չեն մամուլում շրջանառվող այն տեղեկությունները, թե Կուրղինյանին Կրեմլն է ուղարկել: Նա ասաց, որ Կուրղինյանին հրավիրել է քաղաքագետների միությունը, որպեսզի նա իրենց իրազեկի, թե ինչ տեսակետեր կան ռուսական վերնախավում Ռուսաստանի ապագայի վերաբերյալ:

«Եթե գրում են` Կրեմլն է ուղարկել, վիրավորում են քաղաքագետների համքարությանը»,- ասաց նա և հավելեց, որ Կուրղինյանը  չի ներկայացնում մեր ազգային շահերը, քանի որ այդ հնարավորությունը նրան ոչ ոք չի տվել:

Հովհաննիսյանը նաև հայտարարեց. «Այն մարդիկ, ովքեր հրահրում են արտագաղթ, այն հայերն, ովքեր մեկնում են Հայաստանից Ռուսաստան, սպասարկելու են ռուսական պետության շահերը, իսկ Կուրղինյանը Ռուսաստանի քաղաքացի է»: