Apple-ը խուսափել է հարկերից

Ամերիկյան Apple ընկերությունը վերջին 4 տարում տասնյակ միլիարդ դոլարներ չի մուծել երկրի գանձարան` օգտվելով դուստր ընկերությունների ցանցից օֆշորներում եւ օրենսդրության բացթողումներից. ասվում է ԱՄՆ Սենատի ազգային անվտանգության եւ կառավարական գործերի հանձնաժողովի զեկույցում:

2009-2012 թթ. կորպորացիան խուսափել է հարկերից, ինչի արդյունքում մոտ 44 մլրդ դոլար չի մտել պետական գանձարան: Ռեւիզորների առանձնահատուկ ուշադրությունը գրավել են Apple-ի` Իռլանդիայում գրանցված 3 դուստր ձեռնարկություններ, որոնցից մեկը, չունենալով աշխատակիցներ ու գրասենյակներ, նշված ժամանակաշրջանում վաստակել է 30 մլրդ դոլար:

Միաժամանակ, փաստաթղթում նշվում է, որ կորպորացիան օրենք չի խախտել: Փորձագետների կարծիքով`  նման իրավիճակը պետք է խթան լինի գործող օրենսդրության վերանայման համար: