Լավ չես աղոթել, Սերգո՛ ջան

Արմավիրի մարզի Մրգաշատ գյուղի բնակիչները երեկ փակել էին Արմավիր-Երեւան ճանապարհը. պատճառը կարկուտն էր, որը վնասել է գյուղ ողջ բերքը: Կես ժամից ավելի տեւած կարկուտը ոչնչացրել է ոչ միայն այս գյուղի, այլեւ Արմավիրի մարզի Մեծամոր, Արմավիր քաղաքների, Գետաշեն, Նալբանդյան, Բերքաշատ, Ամասիա, Շենավան, Նոր Արտագես, Ջրառատ գյուղերի մշակաբույսերը եւ ցանքատարածությունները: Նույնպիսի վնասներ են կրել Արագածոտն եւ Կոտայք մարզերի որոշ գյուղեր:

Ճանապարհը փակած մրգաշատցիների բողոքները լսելու էր եկել գյուղատնտեսության նախարար Սերգո Կարապետյանը` Արմավիրի մարզպետ Աշոտ Ղահրամանյանի ուղեկցությամբ: Աղոթքից բացի` ռեալ օգնություն պահանջող գյուղացիների հարցը խոստացան բարձրացնել կառավարությունում:

Սակայն բանն այն է, որ նախորդ տարի նույն ժամանակահատվածում եւս կարկուտն ու հեղեղը վնասեցին Արմավիրի մարզի մի քանի գյուղերի մշակաբույսերն ամբողջությամբ, սակայն այդպես էլ օգնություն չստացվեց կառավարությունից:

Ներկայացվող տեսանյութը պատմում է կարկուտի ու հեղեղի վնասների մասին, ինչպես նաեւ ճանապարհը փակած գյուղացիների հետ գյուղնախարարի հանդիպման: