Մամ ջան, պապ ջան, հանգիստ եղեք, հավատացեք՝ անպայման վերադառնալու եմ. հայրենիքի պաշտպանության առաջնագծում

Արցախի պաշտպանության բանակը հայրենիքի պաշտպանության առաջնագծի զինվորներից տեսանյութ է հրապարակել։

Զինծառայողներից մեկը պատմում է, թե ինչպես են իրենք հակառակորդի անօդաչու թռչող սարք խոցել. «Օդային տարածությունը հսկելու ժամանակ նկատել ենք անօդաչու թռչող սարք, որը հայտնվել էր մեր սահմանում, մեր խոցման գոտում։ Նշանակետը դիտելուց, համոզվելուց հետո, որ գտնվում է խոցման գոտում, մեր միջոցներով խոցել ենք հակառակորդի անօդաչու թռչող սարքը»։

Զինվորներից մեկն ասաց՝ առաջնագծում է, որ պաշտպանի իր ընտանիքը, հայրենիքն ու հողը. «Թշնամու կողմից ուղարկված ոչ մի անօդաչու սարք անպատասխան չի կարող մնալ։ Թշնամու ոչ մի տեխնիկա մի քանի վայրկյան ավել չի կարող գոյատեւել մարտի դաշտում։ Ես 19 տարեկանում իմ ծառայակից ընկերների հետ այստեղ եմ, որպեսզի վերջնականապես վերջ դնենք այս բազմադարյա հարցին։ Եկել ու հասունացել է պահը, որ պետք է լուծվի այս խնդիրը՝ մեր հաղթանակով»։

«Ցանկանում եմ բոլոր զինվորների անունից դիմել ծնողներին. ձեր տղան ապահով է, վերադառնալու է ու հասնի ձեզ, մամ ջան, պապ ջան հանգիստ եղեք, առողջ եղեք, այստեղ ամեն ինչ լավ ու ապահով է։ Հավատացեք, անպայման վերադառնալու եմ։ Հայերը, միանշանակ, հաղթանակ են տանելու»,- ասաց զինվորներից մեկը։