ՀՅԴ-ն որևէ ձևով չի փորձի գայթակղել ժողովրդին

ՀՅԴ անդամ, նախկին պատգամավոր Ոուզաննա Առաքելյանի  խոսքով` Երևանի ավագանու ընտրություններում Դաշնակցությունը բավականին հաջող  քարոզարշավ է անցկացնում:

«Մեր կողքին այն ընտրազանգվածն է, ում համար շատ կարևոր է մեր երկրի ապագան»,- լրագրողների հետ հանդիպման ժամանակ հայտարարեց նա և ընդգծեց ՀՅԴ-ի նախընտրական ծրագրի առավելությունները:

ՀՅԴ-ի ծրագիրը տարբերվում է նրանով, որ  առաջարկում է Երևանի ավագանու խորհրդում ստեղծել հանձնաժողով, որը պետք է  վերահսկի Երևանի բյուջեն, և այդ հանձնաժողովը պետք է ղեկավարի ընդդիմությունը: ՀՅԴ-ն իր ծրագրում ներառել է նաև կետեր, որոնք գրեթե բոլոր կուսակցություններն առաջարկում են: Դրանցից է, օրինակ, Երևանի համաչափ զարգացման ծրագիրը, որի մասին, նախկին պատգամավորի խոսքով, առաջին անգամ բարձրաձայնել է հենց Դաշնակցությունը:

«Երևանի շլացուցիչ  կենտրոնը, երբ համեմատում ենք ծայրամասերի հետ,  ահռելի տարբերություն ենք տեսնում»,- ասաց Առաքելյանը և հավելեց, որ Երևանը էկոլոգիական առումով մեր տարածաշրջանում վերջին տեղում է:

Անդրադառնալով ավագանու ընտրություններին  իշխանության որդեգրած քաղաքականությանը` նա ասաց. «Արդեն երկրորդ անգամ գործող իշխանությունները Երևանի քաղաքապետի ընտրությունը վերագրում են անձի ընտրության:  Ամենուրեք տիրում է վախի մթնոլորտ:  Օրինակ` Ավանում ժողովուրդը պատուհաններից էր հետևում Դաշնակցության քարոզարշավին: Այս մթնոլորտը  ոչ միայն կասեցնում է մեր` քաղաքական մշակույթ ձևավորելու գործընթացը, այլև խեղաթյուրում մեր ժողովրդի բարոյական նկարագիրը»:

Ռուզաննա Առաքելյանը նաև նշեց, որ իրենց համար ակզբունքորեն մերժելի է որևէ ձևով  ժողովրդին գայթակղելը: «Կյանքը ցույց տվեց, որ բոլոր ընտրությունները, որոնք անցկացվեցին կաշառքով, խեղել են մեր ժողովրդի ճակատագիրը: Մեզ համար կարևոր է մեր քաղաքացիներից յուրաքանչյուրի ճակատագիրը»,- հայտարարեց նա: