"Ժառանգությանը" շատ են գայթակղել, բայց նա մերժել է բոլորին

Աշնանը քաղաքական դաշտում արմատական փոփոխություններ չեն սպասվում, բոլոր ուժերը կպատրաստվեն հերթական ընտրություններին: Այսօր լրագրողների հետ հանդիպման ժամանակ նման տեսակետ հայտնեց ԱԺ «Ժառանգություն» խմբակցության պատգամավոր Արմեն Մարտիրոսյանը:

«Թե ինչ ընթացք կունենա երկխոսությունը եւ ով` ինչ հանրահավաքներ կանի, իրենց խնդիրն է, բայց քաղաքական դաշտը գնում է հերթական ընտրությունների, եթե, իհարկե, այլ պայմանավորվածություններ չլինեն»,- ասել է ընդդիմադիր պատգամավորը:

Նա նաեւ համոզմունք է հայտնել, որ կուսակցությունն առաջիկա խորհրդարանական ընտրություններից հետո հայտնվելու է ՀՀ Ազգային ժողովում, ընդ որում` ավելի մեծ թվաքանակով եւ ազդեցությամբ:

«Մեր աշխատանքի նպատակաուղղվածությունն անխոցելի է»,- ընդգծել է պատգամավորը` հավելելով, որ «Ժառանգություն»-ն այլընտրանք է ժողովրդին:

Մարտիրոսյանը նշել է նաեւ, որ վերջին չորսուկես տարիներին «Ժառանգությանը» չակերտավոր երկխոսություններ շատ են առաջարկվել, սակայն կուսակցությունը հավատարիմ է մնացել իր քաղաքական գծին։

«Թե' կուսակցությունը, թե' դրա առանձին պատգամավորները վերջին տարիներին բազմաթիվ գայթակղությունների են դիմացել, բայց պատվով մերժել են այդ գայթակղությունները»,- շեշտել է նա: