Պետք է հիմնավորեն` ինչու գնել թանկ մակարոն

Կառավարության այսօրվա նիստում, երբ ֆինանսների նախարարի պաշտոնակատար Վաչե Գաբրիելյանն անդրադարձավ գնումների ոլորտում նախատեսվող փոփոխություններին, վարչապետի պաշտոնակատար Տիգրան Սարգսյանը փոքր-ինչ բարկացած հայտարարեց, որ նախարարի պաշտոնակատարն առանձնացրել է կրկնվող գնումները` գրիչ, միս, ջուր, կարտոֆիլ, ալյուր եւ այլն:

«Հսկող մարմինները հայտնաբերել են, որ շատ հաճախ այդ կրկնվող ապրանքների գինը մրցույթով լինում է ավելի բարձր, քան կարելի է գնել խանութում: Եթե մեկը թանկ թուղթ կամ գրիչ է գնում, պետք է հիմնավորի, թե` ինչու: Խորամանկություններ թույլ չենք տալու, եթե միս ենք առնելու, այս չորս տեսակն է, եթե մակարոն` նշված մակարոնը, թանկ մակարոն չենք առնելու»,- հայտարարեց Սարգսյանը եւ նշեց, որ մրցույթի ընթացքում ապրանքները պետք է ավելի էժան գներով ձեռք բերվեն, այլ ոչ թե գերազանցեն խանութներում առկա գները:

«70-80 տոկոսը կրկնվող գնումներ են, դրա նկատմամբ լինելու է ֆիլտր: Շատ կոպիտ ֆիլտր է, եւ արգելում ենք դրանից բարձր գներով ձեռքբերում»,- հայտարարեց վարչապետի պաշտոնակատարը:

Նա նաեւ նշեց, որ ոչ հավաստի ֆինանսական հաշվետվություն ունեցող ընկերությունները չպետք է իրավունք ունենան մասնակցելու պետական գնումների գործընթացին: Վերջում կարեւորեց, որ պետք է գործընթացին այնպես հետեւեն, որ գնումների մրցույթների կայացումն արհեստականորեն չխոչընդոտվի: