Անդրիաս Ղուկասյանն առաջարկում է քաղաքացիների համապետական ժողով գումարել

ՀՀ նախագահի նախկին թեկնածու Անդրիաս Ղուկասյանը քիչ առաջ հայտարարություն է տարածել ՀՀ քաղաքացիների համապետական ժողով գումարելու անհրաժեշտության մասին: Հայտարարությունում, մասնավորապես, ասվում է.

«Երբ կազմակերպված հանցավոր խմբերը զավթում են պետական իշխանությունը և իրենց վերահսկողության տակ են վերցնում իրավապահ համակարգը, ժողովուրդը զրկվում է իր իշխանությունն իրականացնելու` բոլոր սահմանադրական հնարավորություններից: Իշխանության զավթման արդյունքում ձևավորված բռնապետությունը վերարտադրվում է շինծու ընտրությունների միջոցով: Հանրապետության իշխանության մարմինները հանցավոր ուժերից ազատելու համար անհրաժեշտ է ժողովրդի իշխանության անմիջական դրսևորում:

Հայաստանի քաղաքացիների համապետական ժողովը իրավասու է կայացնել որոշում իշխանությունը զավթողներին ձերբակալելու և մեկուսացնելու վերաբերյալ: Ուստի ապրիլի 9-ին Ազատության հրապարակում քաղաքացիական անհնազանդություն հայտարարած քաղաքացիները, ովքեր երդվել են չճանաչել պետության կեղծ ղեկավարներին, չհնազանդվել անիրավ հրամաններին, չվախենալ, չվաճառվել և չնահանջել, պետք է միավորեն իրենց ջանքերն այդ միջոցառման օրակարգը սահմանելու և ընդունված որոշումներն ի կատար ածելու համար»: