Բերեզովսկուն գտել են պարանը վզին. քննիչ

Մարտի 23-ին Մեծ Բրիտանիայում մահացած ռուսաստանցի գործարար Բորիս Բերեզովսկուն գտել են պարանը վզին: Այս մասին տեղեկատվություն է տարածել Sky News-ը` վկայակոչելով քննիչ Մարկ Բիսելին: Նույն պարանի մի կտոր էլ ոստիկանները հայտնաբերել են լոգարանի ձողից կախված:

Բիսելի հայտարարությունը հնչել է այսօր կորոներական դատարանում` Բերեզովսկու մահվան փաստերի դատալսումների ժամանակ: Քննիչի խոսքերով` գործարարի տան խուզարկությունը կշարունակվի եւս մի քանի օր:

Հիշեցնենք, որ այսօր Guardian-ը, վկայակոչելով մահացածի ընտանիքից աղբյուր, գրել էր, թե դիահերձման ժամանակ պարզվել է, որ Բերեզովսկու կողը կոտրված է: Միաժամանակ, գործարարի մարմնին որեւէ կապտուկ չի հայտնաբերվել: