Facebook-ի բաժնետոմսերի 50 տոկոսին հավակնող ամերիկացին կարող է բանտում հայտնվել

Ամերիկացի Փոլ Սելիան, ով հավակնում էր Facebook սոցիալական ցանցի բաժնետոմսերի 50 տոկոսին, կեղծ փաստաթղթեր է ներկայացրել որպես ապացույց: Նման եզրահանգման է եկել ԱՄՆ դատարանը: Սելիային 40 տարվա բանտարկություն է սպառնում խարդախության համար. տեղեկացնում է РБК-ն:

Սելիան պնդում էր, որ 2003-ին հազար դոլարով վարձել է Facebook-ի հիմնադիր Մարկ Ցուկերբերգին, որ նա կոդ գրի իր StreetFax IT-նախագծի համար: Նաեւ իբր հազար դոլար էլ վճարել է, որ Ցուկերբերգը զարգացնի The Face Book նախագիծը` պայմանով, որ իրեն կհասնի դրա բաժնետոմսերի 50 տոկոսը: 2010-ին Սելիան Ցուկերբերգի դեմ հայց էր ներկայացրել դատարան` ներկայացնելով փաստաթղթեր, որոնք պետք է ապացուցեին 2003-ի գործարքը:

Facebook-ի ներկայացուցիչները դատարանին հայտնել էին, որ Ցուկերբերգն իսկապես աշխատել է Սելիայի StreetFax ծրագրի վրա, սակայն 50 տոկոսի վարկածը բացարձակ սուտ է: