ՀՊԵՆ-ի և Սերգեյ Սմբատյանի համար գրված սիմֆոնիայի պրեմիերան` այսօր

Մարտի 27-ին Արամ Խաչատրյանի անվան համերգասրահում տեղի կունենա Հայաստանի պետական երիտասարդական նվագախմբի համերգը` ՀՀ նախագահի մրցանակի դափնեկիր, հանրահայտ դաշնակահարուհի Արուս Աճեմյանի հետ համատեղ:

Համերգի առաջին մասում նվագախումբն իր լսարանին է ներկայացնելու բոլորովին նոր` դեռևս չկատարված ստեղծագործություն` Էդուարդ Հայրապետյանի «Լարային սիմֆոնիան»: Այն գրվել է 2013-ին` հատուկ նվագախմբի եւ Սերգեյ Սմբատյանի համար: Ստեղծագործությունը նվիրվել է հայ մեծ կոմպոզիտոր Արամ Խաչատրյանի 110-ամյա հոբելյանին:

Երեկոյի երկրորդ բաժնում կհնչի Սերգեյ Ռախմանինովի «Դաշնամուրի կոնցերտ թիվ 2»-ը:

Ի դեպ, Աճեմյանը նվագախմբի հետ համերգ է տվել նաեւ 2012-ի դեկտեմբերին` նվիրված իր հոր` կոմպոզիտոր Վարդան Աճեմյանի հոբելյանին: