Լեզվակռիվ ԱԺ-ում. ԱԺ նախագահը ստիպված միջամտեց

ԱԺ-ում 2012թ. մայիսի 6-ին կայացած խորհրդարանական ընտրությունների վերաբերյալ ԿԸՀ հաղորդագրությունը ներկայացնելու ժամանակ ԿԸՀ նախագահ Տիգրան Մուկուչյանը լեզվակռվի բռնվեց ԱԺ ՀԱԿ խմբակցության պատգամավոր Նիկոլ Փաշինյանի հետ:

Փաշինյանը նախ հայտարարեց, որ կեղծված են եղել թե' խորհրդարանական, թե' նախագահական ընտրությունները եւ նույն մեխանիզմներով կեղծվելու են նաեւ մայիսին կայանալիք Երեւանի ավագանու ընտրությունները: «Այդ կեղծիքի մեղավորը հենց Դուք եք»,- հայտարարեց Նիկոլ Փաշինյանը եւ հետաքրքրվեց, թե ներկայացված հայտարարությունների վերաբերյալ քրեական գործեր հարուցվե՞լ են, եւ արդյո՞ք համապատասխան մարդիկ պատժվել են:

Իր հերթին, Տիգրան Մուկուչյանը հայտարարեց, որ Փաշինյանն օգտվում է այն հանգամանքից, որ իր «դաստիարակությունը թույլ չի տալիս նման ոճով պատասխանել», ինչը հունից հանեց ՀԱԿ պատգամավորին: Անդրադառնալով Մուկուչյանի հայտարարություններին` Փաշինյանը նշեց.  «Եթե Ձեզ թվում է, որ շուտասելուկ բառակույտերով տպավորություն եք թողնում, չարաչար սխալվում եք: Դաստիարակության մասին եք խոսում: Ձեր դաստիարակությունը հերիքո՞ւմ է, որ ԱԺ ամբիոնից հասարակության առջեւ ստեք եւ սուտ փաստեր ներկայացնեք»:

Փաշինյանը հետաքրքրվեց, թե ինչո՞ւ ԿԸՀ հաշվետվության մեջ չկա, որ, օրինակ, մի բնակարանում գրացվել է 100-ից ավելի ՀՀ քաղաքացի չհանդիսացող մարդ: Նա հայտարարեց, որ պատրաստ է իր ասածներն ապացուցել, եւ Մուկուչյանին բանավեճի առաջարկություն արեց:

Իր հերթին, Մուկուչյանը հայտարարեց, որ ՍԴ-ում առիթ ունեցել են նրանց հիմնավորումները լսելու եւ այլեւս հրաժարվում է լսել Նիկոլ Փաշինյանի պարզաբանումները:

Նիկոլ Փաշինյան-Տիգրան Մուկուչյան լեզվակռվին միջամտեց ԱԺ նախագահ Հովիկ Աբրահամյանը: «Դարձել եք միահեծան ղեկավար, բոլորին հրավիրում եք «նա կավյոռ»,- դիմելով Փաշինյանին՝ հայտարարեց ԱԺ նախագահը: