Ամենամեծ ձեռքբերումս կլինի ճիշտ ժամանակին մահանալը. Խուլիո Իգլեսիասի

Իմ ամենամեծ կորուստը ժամանակս է, իսկ ամենամեծ ձեռքբերումը կլինի ժամանակին մահանալը. լրագրողների հետ հանդիպման ժամանակ հայտարարեց աշխարհահռչակ երգիչ Խուլիո Իգլեսիասը:

Երգիչը նշեց, որ իր ամբողջ կյանքը բաղկացած է երգերից, եւ բոլոր այդ երգերը կազմում են իր կյանքի պատմությունը: Իգլեսիասը հավաստիացնում է, որ համերգին հայերեն մի երգ կկատարի եւ ինքն արդեն ուսումնասիրել է, թե հայերը հատկապես որ երգն են սիրում:

«Հանդիսատեսն այնքան էլ կապ չունի, կարեւորը` հոգով երգելն է: Երկուշաբթի համերգին ես փակելու եմ աչքերս, պատկերացնեմ, որ տիեզերքում եմ եւ երգեմ»,- ասաց Իգլեսիասը: Երգիչը նշում է, որ ինքը երազանքներին տրվող մարդ չէ եւ ավելի շատ իրական կյանքով է ապրում.«Ես չեմ երազում, այլ նպատակներ եմ դնում իմ առջեւ եւ փորձում իրականացնել դրանք»:

Նա կարծում է, որ կանանց սերը վայելելու մեջ առանձնապես հաջողություն չունի. ըստ նրա՝ ինքը պարզապես սիրում է կանանց, եւ համարում, որ բոլոր կանայք զգում են, երբ սիրում են իրենց:

Անդրադառնալով այն հարցին, թե փոքր տարիքում երգիչը ֆուտբոլով է զբաղվել եւ միայն դժբախտ պատահարից հետո է թողել ֆուտբոլը, արդյո՞ք եթե դեպքը տեղի չունենար, կշարունակեր ֆուտբոլով զբաղվել, երգիչը պատասխանեց, որ ինքը երբեք լավ ֆուտբոլիստ չի եղել, չնայած խաղացել է Մադրիդի «Ռեալում».«Կարծում եմ, որ ավելի շատ ինձ մոտ երգելն է ստացվում»: