Թուրքիայի ազգային փոքրամասնությունները չեն հավատում իշխանություններին

Թուրքիայի փոխվարչապետ Բյուլենթ Արընչը կոչ է արել Թուրքիան անցյալում` վատ վերաբերմունքի պատճառով լքած ազգային փոքրամասնություններին` վերադառնալ, նաեւ նրանց վերաբերյալ օրենսդրության մեջ փոփոխություններ է  խոստացել: Սակայն ազգային փորքամասնությունները կասկածում են, որ դրանց կոնկրետ քայլեր կհետեւեն. ըստ Regnum-ի` տեղեկացնում է թուրքական Zaman օրաթերթը:

Թերթը գրում է, որ վերջին հարյուրամյակում փոքրամասնությունները ենթարկվել են ջարդերի, սպանությունների, արտաքսման, բռնագրավվել է նրանց գույք:

Ստամբուլի երբեմնի մեծ հունական համայնքի Apoyevmatini թերթի գլխավոր խմբագիր Միխայիլ Վասիլիադիսը ասել է, որ Էրդողանն էլ էր ուղղափառ հույներին Թուրքիա վերադառնալու կոչ անում: «Ես հոգնել են նույն բանն անընդհատ կրկնելուց: Հաճելի է հնչում, երբ ասում են, որ Թուրքիան լքածները պետք է վերադառնան: Սակայն նրանց 90 տոկոսը հեռացել է կյանքից, այնպես որ` քիչ հավանական է, որ նրանք կկարողանան վերադառնալ»,- ասել է նա:

Իսկ հայկական համայնքի ներկայացուցիչ Գարո Ռայլանի խոսքերով` իրենք «նման ռոմանտիկ զանգեր» բազմիցս են լսել: Ըստ նրա` պետությունն ունի «դոմինանտ էթնիկ խմբի» պաշտոնական գաղափարը եւ իր քաղաքացիներին հավասար մակարդակի վրա չի դնում, ընդհակառակը` իր քաղաքացի հայերին մշտապես դիտարկել է որպես Հայաստանի հետ հարաբերություններում ճնշման գործիք: