ԼՂՀ մշակույթի նախարարը ելույթ կունենա ԱՄՆ Կոնգրեսում

ԼՂՀ մշակույթի եւ երիտասարդության հարցերի նախարար Նարինե Աղաբալյանը Արցախյան շարժման 25-ամյակի կապակցությամբ ելույթ կունենա ԱՄՆ Կոնգրեսում. տեղեկացնում է ՀՅԴ Ամերիկայի Հայ Դատի հանձնախումբը:

Արցախի նախարարը ԱՄՆ կժամանի մարտի 13-ին եւ կմասնակցի Կոնգրեսում կազմակերպված ուսուցողական ծրագրին, նաեւ ամերիկացի օրենսդիրների, հայ համայնքի ներկայացուցիչների հետ կնշի Արցախյան շարժման 25-ամյակը: Միջոցառումը կազմակերպվել է ԱՄՆ Կոնգրեսի հայկական հարցերով խմբի, ՀՀ դեսպանության, ԱՄՆ հայկական կազմակերպությունների կողմից:

«Այս ծրագիրը ոչ միայն հիանալի հնարավորություն է` տոնելու Արցախի ժողովրդավարական, տնտեսական եւ մշակութային զարգացումը, այլեւ նշելու այդ հիասքանչ սերնդի երիտասարդ առաջնորդների վաստակը, որոնք ջանք չեն խնայում իրենց երկրի լուսավոր ապագայի համար»,- ասել է Հայ Դատի հանձնախմբի գործադիր տնօրն Արամ Համբարյանը: