Ընդդիմության կետերի շուրջ համաձայնություն կա

ԱԺ «Ժառանգություն» եւ ՀՅԴ խմբակցությունների ղեկավարներ Ռուբեն Հակոբյանն ու Արմեն Ռուստամյանը երեկ ԱԺ նախագահին են ներկայացրել ԱԺ որոշման նախագիծը, որը պետք է դրվի ԱԺ արտահերթ նիստի օրակարգում՝ որպես հետընտրական գործընթացներն ԱԺ-ում քննարկելու հիմք:

Փաստաթղթում ձևակերպված է երեք հիմնական պահանջ՝ արտահերթ խորհրդարանական ընտրությունների նշանակում, պետական կառավարման խորհրդարանական համակարգին անցում եւ ընդդիմությանը վերահսկողական լծակների տրամադրում:

Այսօր կրկին Ռուբեն Հակոբյանը եւ Արմեն Ռուստամյանը ԱԺ նախագահի մոտ էին: Մոտ մեկ ժամ տեւած հանդիպումից հետո Արմեն Ռուստամյանը հայտարարեց, որ քանի որ բանկցությունները դեռ չեն հասել որեւէ եզրահանգման, բանակցությունների արդյունավետությունը նկատի ունենալով` որեւէ մեկնաբանություն տալ չի ուզում:

«Համաձայանության հնարավորություն այդ երեք կետերի շուրջ կա»,-հայտարարեց Ռուստամյանը:
ՀՅԴ-ական պատգամավորը հայտարարեց, որ քննարկումները շարունակելու են այնքան ժամանակ մինչեւ որ հասնեն ինչ-որ եզրահանգման: Ռուստամյանը հայտարարեց, որ հաջորդ հանդիպումը կկայան այսօր կամ վաղը: