Ես միշտ գործին միացող եմ. Լևոն Տեր-Պետրոսյան

Արդեն տեղեկացրել ենք, որ ՀՀՇ այսօրվա արտահերթ համագումարին մասնակցում է նաև ՀՀ առաջին նախագահ Լևոն Տեր-Պետրոսյանը:

Լրագրողները նրան մի քանի հարց ուղղելու հնարավորություն ունեցան համագումարի ընդմիջման ժամանակ: «Ինչպե՞ս է վերաբերվում Րաֆֆի Հովհաննիսյանի` այս օրերի նախաձեռնությանը» հարցին, Տեր-Պետրոսյանը նախ զարմացած արձագանքեց` ի՞նչ նախաձեռնություն, հետո հայտարարեց. «Րաֆֆի Հովհաննիսյանը դա չի նախաձեռնել, ժողովուրդն է նախաձեռնել: Ժողովուրդը եկել և իր բողոքն է արտահայտում անօրինակության դեմ»:

Yerkir.am-ի հարցին` հնարավո՞ր է ինքը միանա Րաֆֆի Հովհաննիսյանին, Լևոն Տեր-Պետրոսյանն ասաց. «Ես միշտ գործին միացող եմ: Առայժմ ժողովուրդը գործ արե՞լ է, հասկանո՞ւմ եք: Ժողովուրդը եկել է հրապարակ և այս իշխանության դեմ է բողոքում, բայց այդ բողոքավորները, բողոքատերերը դեռևս գործ չեն արել: Ժողովուրդը գործ արե՞լ է, պահանջատե՞ր է կամ իրավատեր: Միայն այսքանը: Երբ որ գործ կանի, այն ժամանակ կգնահատենք և, եթե հարկ համարենք, կմիանանք»:

Ուշագրավ է, որ Նիկոլ Փաշինյանի` Րաֆֆի Հովհաննիսյանին միանալու վերաբերյալ Yerkir.am-ի լրագրողի` մի քանի անգամ հնչեցրած հարցը, Տեր-Պետրոսյանն այդպես էլ անպատասխան թողեց: