Երեւանում ավտոմեքենան արմատախիլ է արել ծառը եւ կողաշրջվել

Այսօր խոշոր ավտովթար է տեղի ունեցել Երևանում: Ժամը 21:20-ի սահմաններում «Օպել» մակնիշի 31 ՏՏ 733 համարանիշի ավտոմեքենայի վարորդը Նոր Նորք վարչական շրջանի Թևոսյան փողոցում դուրս է եկել երթևեկելի գոտուց, բախվել բաժանարար գոտու ծառին, արմատախիլ արել այն և կողաշրջվել:

Ֆոտոլրագրող Գագիկ Շամշյանի հաղորդմամբ` վարորդին և 2 ուղևորներին ավտոմեքենայից դուրս են բերել քաղաքացիները, որոնց շտապօգնության մեքենաները տեղափոխել են «Սուրբ Գրիգոր Լուսավորիչ» բժշկական կենտրոն:

Նոր Նորք վարչական շրջանի կանաչապատման աշխատակիցները հատուկ տեխնիկայով կտրել են արմատախիլ եղած ծառը, որպեսզի այն չխանգարի երթեւեկությանը: Քննիչի հանձնարարականով` ոստիկանությունը պարզում է վարորդի և հիվանդանոց տեղափոխված անձանց ինքնությունը: