Սարգսյանի համար օտարերկրյա դիվանագետը "նորաթուխ բլոգեր" է

Հայաստանի նախագահ, նախագահի թեկնածու Սերժ Սարգսյանը Քանաքեռ-Զեյթուն վարչական շրջանում իր նախընտրական քարոզարշավի ժամանակ այս անգամ էլ անդրադարձել եւ քննադատել է օտարերկրյա դիվանագետի, մասնավորապես` Հայաստանում Լեհաստանի դեսպան Զդիսլավ Ռաչինսկիի հայտարարությանը։

«Նախընտրական բնական լարվածության տակ են ի հայտ գալիս երեւույթներ, որոնք սովորական ժամանակ քողարկված են։ Եվ բնական է, որ այս օրերին ամեն ինչ կարելի է տեսնել: Օրինակ` կարելի է տեսնել, թե ինչպես օտարերկրյա բարձրաստիճան դիվանագետն իր հանրային խոսքը ձեւակերպում է որպես նորաթուխ բլոգեր»,- հայտարարել է Սերժ Սարգսյանը:

Հիշեցնենք, որ դեսպան Ռաչինսկին «Հայկական ժամանակ» օրաթերթին տված հարցազրույցում խիստ քննադատություն էր հնչեցրել Հայաստանի իշխանությունների հասցեին` կարծիք հայտնելով, թե Պարույր Հայրիկյանի նկատմամբ հնարավոր եղավ մահափորձ իրականացնել, որովհետեւ Հայաստանում չի վերացել անպատժելիության մթնոլորտը: