Սփյուռքի նախարարության կայքը վերականգնման փուլում է

Սփյուռքի նախարարության կայքէջը շուրջ մեկ ամիս է` չի գործում: Պատճառը տեխնիկական խնդիրներն են:

Սփյուռքի նախարարության մամուլի և հասարակության հետ կապերի վարչության պետ Էվելինա Բաղդասարյանը yerkir.am-ի հետ զրույցում նշեց, որ կայքի տեխնիկական խնդիրները պայմանավորված են նախարարություններին ինտերնետ տրամադրող ծառայության փոփոխությամբ, սակայն, միաժամանակ, հայտնեց, որ վաղը կայքն արդեն կգործի:

ՀՀ կառավարությունում ևս տարեսկզբին փոխվել է ինտերնետ մատակարարող ընկերությունը, սակայն նման խնդիրներ չեն եղել: Վարչապետի մամուլի քարտուղար Հարություն Բերբերյանը մեզ հետ զրույցում նշեց, որ նախարարության ինտերնետ ծառայության փոփոխությունը հնարավոր է` նման խնդիրներ առաջացնի, սակայն դրանք հնարավոր է արագ լուծել:

Ի դեպ, մյուս նախարարություններում նման խնդիր չի եղել:

Կրթության և գիտության նախարարության հասարակության հետ կապերի վարչության պետ Արթուր Բաղդասարյանը մեզ հետ զրույցում նշեց, որ  Հայաստանում ընդհանրապես հարկավոր է լավացնել ինտերնետ կապը: