Սարիբեկյանը հայ գրականությունը ″մաքուր գրականության″ տարածք է մտցնում

Այսօր ժամանակակից գրող Հրաչյա Սարիբեկյանի ծննդյան օրն է:

Սարիբեկյանը ծնվել է 1979, հունվարի 24-ին` Վանաձորում: Առաջին անգամ տպագրվել է «Գարուն» ամսագրում` 2000 թ.։ 2008-ին արժանացել է ՀԳՄ անտիպ լավագույն վեպի մրցանակի, իսկ 2010-ին` «Նարցիս» հանդեսի մրցանակին` «Կույրինը` կույրին» պատմվածքի համար։ 2012-ին լույս է տեսել գրողի` առաջին վեպը` «Երկվորյակների արեւը»:

Գրականագետ Արքմենիկ Նիկողոսյանը yerkir.am-ի հետ զրույցում նշեց, որ Հրաչյա Սարիբեկյանն իր դեռ շատ կարճ ստեղծագործական կյանքում արդեն կարողացել է արդի հայ գրականության պարագծում ուրույն տեղ ունենալ:

Նրա պատմվածքները, վիպակները, ու հատկապես վերջերս լույս տեսած «Երկվորյակների արևը» վեպը ժանրային իրացումների առումով թարմություն են բերում: Հրաչի ստեղծագործությամբ մեր գրականությունը վճռականապես թևակոխում է այսպես կոչված՝ «մաքուր գրականության» տարածք (չխառնել արվեստը արվեստի համար տեսության հետ)՝ զերծ գաղափարական պարտադրանքներից ու տեղային խնդիրների երբեմն չափազանցված կարևորումից»,- ասաց Նիկողոսյանը: