Դեդ Հասանի սպանությունը վրեժ է Յապոնչիկի մահվան համար

Ասլան Ուսոյանի սպանությունը կազմակերպվել է մեկ այլ քրեական հեղինակություն Վյաչեսլավ Իվանկովի` Յապոնչիկի սպանության համար վրեժխնդիր լինելու համար. գրում է Известия-ն:

Հանցագործությունը կատարվել էր 4 տարի առաջ եւ նպաստել քրեական աշխարհի պառակտմանը: Յապոնչիկի հուղարկավորության ժամանակ «օրենքով գող» Ալեքսեյ Սուվորովը` Պետրիկը, երդվել էր վրեժ լուծել նրա մահվան համար, ընդ որում` ամենաստորացուցիչ ձեւով` կրակելով փորին: Որոշ ժամանակ անց մահափորձ արվեց Դեդ Հասանի դեմ, սակայն նրան փրկեց ավելորդ քաշը. գնդակը որովայնի յուղային շերտով էր անցել:

Известия-ի աղբյուրները նշում են, որ սլավոնական քրեական հեղինակությունները, մասնավորապես` Սուվորովը, ներկա չէին Դեդ Հասանի հուղարկավորությանը: Ուսոյանին հրաժեշտ տալու էին եկել  Կովկասի հետ կապված քրեական հեղինակությունները, իսկ 1990-ականներին Սուվորովը տարաձայնություններ է ունեցել վերջիններիս հետ: Ոստիկանության տվյալներով` վերջին շրջանում Դեդ Հասանի եւ Պետրիկի հարաբերությունները շատ լարված էին:

Իհարկե, թերթը նշում է, որ պատվիրատուների առումով այլ վարկած էլ կա` վրացական կլանը: