Աբխազիայի նախագահը դեռեւս չի տեսնում տարանցիկ երկաթուղու վերագործարկման հեռանկար

Աբխազիայի նախագահ Ալեքսանդր Անկվաբը հայտարարել է, որ դեռեւս չի տեսնում տարանցիկ երկաթուղու վերականգնման հեռանկար. տեղեկացնում է РИА Новости-ն

Հիշեցնենք, որ անցյալ շաբաթ Վրաստանի վարչապետ Բիձինա Իվանիշվիլին Երեւանում հայտարարել էր, որ Թբիլիսին պատրաստ է քննարկել Աբխազիայի հետ` 1992-93թթ. վրաց-աբխազական զինված հակամարտության արդյունքում դադարեցված երկաթուղային հաղորդակցության վերականգնման հարցը:

«Աբխազիայի ղեկավարությանը ոչ ոք չի դիմել այդ հարցով»,-  Սուխումում լրագրողներին հայտնել է Անկվաբը: Նա նշել է, որ եթե կոնկրետ առաջարկներ լինեն, չի բացառվում, որ այն հասարակական քննարկման դրվի:

Անկվաբը նշել է, որ հասկանում է, որ այլ երկրներ շահագրգռված են Աբխազիայով անցնող երկաթուղու վերաշահագործմամբ, սակայն դժվար է պատկերացնում, թե ինչպես դա կիրականացվի:

«Կարող եմ հիշեցնել, որ Ադրկովկասյան երկաթուղու աբխազական հատվածով խորհրդային տարիներին անցնում էին 24 զույգ բեռնատար եւ 14 զույգ մարդատար գնացքներ, Անդրկովկաս տեղափոխվող բեռների 13-15 տոկոսը: Թե ինչ է հնարավոր հիմա, դժվարանում եմ ասել»,- նշել է Աբխազիայի նախագահը: