Հոսնի Մուբարաքը երկրի գանձարան 2,7 մլն դոլար կվերադարձնի

Եգիպտոսի գլխավոր դատախազությունը համաձայնել է Եգիպտոսի նախկին նախագահ Հոսնի Մուբարաքի փաստաբանների առաջարկի հետ` երկրի գանձարան վերադարձնել 18 միլիոն եգիպտական ֆունտ (2,7 միլիոն դոլար). հայտնում է  Лента.ру-ն:

Այդ գումարով Մուբարաքը պետությանը կփոխհատուցի «Ալ Ահրամ» մեդիահոլդինգից նախկինում ստացած նվերների արժեքը: Եգիպտոսի նախկին նախագահի ընտանիքը գումարը պետք է վճարի երկու օրվա ընթացքում: Փոխարենը փաստաբանները պահանջում են, որպեսզի  Մուբարաքի գործի քննությունը դադարեցվի։

Հունվարի 13-ին Եգիպտոսի Վճռաբեկ դատարանը բավարարել է նախկին նախագահի գործի վերանայման միջնորդությունը: Նոր լսումների ժամկետը դեռևս հայտնի չէ։