Բիզնեսմեն Մազը

Ամեն տեսակ ընդդիմությանն ատող ու Սերժ Սարգսյանին պարբերաբար սատարող ռեժիսոր Արմեն Մազմանյանը, պարզվում է, այս իշխանության օրոք ոչ միայն պաշտոնական առաջընթաց գրանցեց` դառնալով Երևանի թատրոնի և կինոյի պետական ինստիտուտի ռեկտոր, այլև լայն թափով առաջ է գնում բիզնես բնագավառում, ընդ որում՝ միջազգային. գրում է «Ժամանակ»-ը:

«Ժամանակի» հավաստի տեղեկություններով՝ Արմեն Մազմանյանը իտալական «Ալ Իտալիա» ավիաընկերության հետ աշխատող «Ֆեստա Տուր Ավիա» ընկերության համասեփականատերն է, ինքնաթիռ է վարձակալել և Երևան-Հռոմ չվերթեր է իրականացնում:

Երեկ թերթը փորձել է նրա հետ խոսել, սակայն պարոն Մազմանյանը, տեղեկանալով հարցի էությանը, քարտուղարուհու միջոցով պատասխանել է, որ զբաղված է` «Ժամանակի» հարցերին պատասխանելու համար:

Թերթը հիշեցնում է, որ Արմեն Մազմանյանը Վանո Սիրադեղյանի ՆԳ նախարար եղած ժամանակ դատապարտվել էր խուլիգանություն կատարելու և ապօրինի զենք կրելու համար, ինչի համար էլ, թերևս, ատում է ՀՀՇ-ին: Իսկ Սերժ Սարգսյանին խիստ համակրելու առիթներ, փաստորեն, կան: