Սահակաշվիլին վետո է դրել ''Համաներման մասին'' օրենքի մի մասի վրա

Վրաստանի նախագահ Միխեիլ Սահակաշվիլին վետո է դրել «Համաներման մասին» օրենքի այն մասի վրա, որը վերաբերում է քաղբանտարկյալներին եւ դեռահասների նկատմամբ հանցագործություններ կատարած անձանց. տեղեկացնում է apsny.ge-ն։

«Քաղբանտարկյալների այդ ցուցակն ընդունել են ի հեճուկս ինձ։ Սակայն ես թույլ չեմ տա, որպեսզի երկիրը խայտառակվի, այդ իսկ պատճառով վետո եմ դնում օրենքի այն մասի վրա, որը վերաբերում է քաղբանտարկյալներին», - հայտարարել է նա եւ հավելել, որ իր համար անընդունել է նաեւ դեռահասների նկատմամբ սեռական բնույթի հանցագործություններ կատարած անձանց ազատ արձակումը։

Վրաստանի խորհրդարանի կողմից դեկտեմբերի 21-ին ընդունված օրենքը ենթադրում է լայնամասշտաբ համաներում։ Նախագահի վետոյի հաղթահարման համար խորհրդարանին անհրաժեշտ են պատգամավորների ձայների 3/5-ը։ Խորհրդարանի նախագահ Դավիթ Ուսուպաշվիլին այսօր հայտարարել է, որ խորհրդարանական մեծամասնությունը ձգտելու է հաղթահարել նախագահի վետոն։