Տեր-Պետրոսյանը ՀՀՇ համագումարում կակնարկի՞ իր որոշման մասին

Այսօր ԱԺ-ում լրագրողները ԱԺ ՀԱԿ խմբակցության ղեկավար Լեւոն Զուրաբյանից հետաքրքվեցին, թե հնարավո՞ր է, որ ՀԱԿ-ն առհասարակ բոյկոտի նախագահական ընտրությունները: Նա հայտարարեց, որ այս պահին ոչ մի տարբերակ էլ չի բացառվում:

«Այս վիճակում իսկապես պետք է մտածել` որն է ամենաարդյունավետ միջոցը այս ռեժիմի դեմ պայքարելու համար: Հարցը բուռն քննարկումների փուլում է գտնվում ՀԱԿ-ում, եւ բնականաբար, շատ բան կապված է Լեւոն Տեր-Պետրոսյանի անձնական որոշումից: Տեր-Պետրոսյանը լրջորեն կշռում է, որի հիման վրա էլ իր որոշումը կկայացնի»,- հայտարարեց Զուրաբյանը:

Yerkir.am-ի հարցին, թե Տեր-Պետրոսյանի որոշումը հրապարակվելու է ՀՀՇ համագումարո՞ւմ, ՀԱԿ խմբակցության ղեկավարը պատասխանեց, որ կախված չէ համագումարից, հնարավոր է, որ Տեր-Պետրոսյանը դրա մասին ակնարկի կամ խոսի, բայց մեխանիկական կապ համագումարի եւ նրա որոշման հայտարարման միջեւ չկա:

Իսկ Զուրաբյանի կարծիքով՝ կառաջադրվի՞ Տեր-Պետրոսյանը, թե՞ ոչ, նա նշեց, որ տպավորությունների վրա երբեք չպետք է հիմնավորվել: «Ես որեւէ տպավորություն չունեմ: ՀԱԿ-ում ավելի մեծ դեր խաղում են ոչ թե տպավորությունները կամ ցանկությունները, այլ ռացիոնալ քաղաքական հաշվարկները»,- հայտարարեց Զուրաբյանը:

Հարցին թե նախագահական ընտրությունների հետ կապված որեւէ բան փոխե՞լ է գաղտնալսված զրույցի ձայնագրությունը, Զուրաբյանը հայտարարեց, որ այն ուժեղացրել է այս ապօրինի ռեժիմի դեմ պայքարելու վճռականությունը: