Վահան Հովհաննիսյանն անթույլատրելի է համարում գաղտնալսումը

ԱԺ ՀՅԴ խմբակցության պատգամավոր Վահան Հովհաննիսյանը գաղտնալսումը անթույլատրելի է եւ ամենաանցանկալի ձեւն է համարում: ԱԺ-ում լրագրողների հետ զրույցում նա ընդգծեց, որ դա անօրինական է, եթե առանց դատարանի որոշման է արվել:

«Թե ո՞ւմ էր դա ձեռնտու, բոլորովին այլ հարց է, քանի որ կարող էր ձեռնտու լինել իշխանության որոշ շրջանակների, ինչու ոչ՝ նաեւ ընդդիմության որոշ շրջանակների»,- հայտարարեց Վահան Հովհաննիսյանը:

Լրագրողների այն դիտարկմանը, թե ինչո՞ւ կարող էր ձեռնտու լինել ընդդիմադիր որոշ շրջանակների, Հովհաննիսյանը պատասխանեց, որ ընդդիմության մեջ եղած մրցակցին թուլացնելը եւս կարող էր դրդապատճառ լինել: Չնայած սրան` նա ոչ մեկին չի շտապում մեղադրել, առավել եւս` չի կարծում, որ ընդդիմադիրների ձեռքի գործն է` օրինակները զուտ տեսականորեն բերեց:

Վահան Հովհաննիսյանը համոզված է, որ կողմերը պետք է դատի տան, որ գործն ամբողջությամբ բացահայտվի, եւ հենց շահագրգիռ կողմերը պետք է բացահայտեն կազմակերպիչներին: