Պուտինը մեծամասնականներին վերադարձնում է Պետդումա

Այսօր Դաշնային ժողովի առջեւ ելույթում ՌԴ նախագահ Վլադիմիր Պուտինը առաջ է քաշել Պետդումայի ընտրությունների խառը համակարգին (կուսակցական ցուցակներով եւ միամանդատ տարածքներով ընտրություններ) վերադառնալու գաղափարը. տեղեկացնում է РБК-ն:

«Բազմաթիվ քաղաքական կուսակցություններ եւ փորձագետներ առաջարկում են վերադառնալ Պետդումայի ընտրությունների խառը համակարգին: Ես համաձայն եմ»,- հայտարարել է նախագահը` հավելելով, որ ընտրատարածքների սահմանները դեռեւս պետք է որոշել:

Միաժամանակ, ըստ նրա, ընտրական բլոկների մասնակցության հարցը պետք է առանձին քննարկվի, դա պահանջում է մանրամասն քննարկումներ ու բանավեճեր:

Պուտինի կարծիքով` նշված միջոցառումները հնարավորություն կտան քաղաքական համակարգը դարձնել ավելի բաց, արդար եւ մրցունակ, նոր առաջնորդների, վառ ու անկախ մարդկանց համար ճանապարհ կբացեն:

Հիշեցնենք, որ Պետդումայի 2007 թվականի ընտրություններն անցկացվել են միայն համամասնական ընտրակարգով, այսինքն` բոլոր 450 պատգամավորները ընտրվել են կուսակցական ցուցակներով: Մինչ այդ Պետդումայի ընտրություններն անցկացվում էին խառը համակարգով` 225 մանդատ` մեծամասնականով, 225 մանդատ` համամասնականով: