Նոր պատվաստանյութ` ամենամյա պատվաստումների փոխարեն

Ամենամյա պատվաստման խնդիրը կարող է լուծվել մոտակա 3-5 տարում. տեղեկացնում է doctors.am-ը:

Գիտնականները պնդում են, որ մշակել են այնպիսի համապիտանի պատվաստանյութ, որը ցմահ պաշտպանություն է ապահովում գրիպի բոլոր շտամներից, ներառյալ` նաև թռչնի և խոզի գրիպները:

Պատվաստանյութի մշակմամբ զբաղվել է վարակաբան-գիտնականների մի խումբ` պրոֆեսոր Ջոն Օքսֆորդի ղեկավարությամբ, Սբ Բարդուղիմեոսի Լոնդոնի թագավորական հիվանդանոցից:

Կլինիկական փորձարկումները պարզել են, որ գրիպ-V կոչվող դեղամիջոցը իմունային համակարգին թույլ է տալիս ճանաչել վարակի այն մասը, որը միանման է բոլոր շտամների մոտ: Իսկ դրանց արտաքին թաղանթը փոխվում է, ինչը մինչ օրս ստիպում էր գիտնականներին նորանոր պատվաստանյութեր ստեղծել:

Բացի այդ, կամավորների շրջանում անցկացված ուսումնասիրություններն ապացուցել են, որ պատվաստանյութը նվազեցնում է ախտանշանների արտահայտումը: Ընդ որում` պատվաստվածների իմունային համակարգերն ավելի ակտիվ են:

Մասնագետներին նաև հաջողվել է պարզել, թե դեղամիջոցի որ չափաբաժինն է առավել արդյունավետ: