«Մենք լաբորատոր առնետներ չենք». ֆրանսիացիները դուրս են եկել փողոց՝ ընդդեմ պատվաստումների

Օգոստոսի 28-ին 160 հազար մարդ բողոքի ակցիաների է դուրս եկել ամբողջ Ֆրանսիայում. հայտնում է France-24 հեռուստաալիքը՝ վկայակոչելով ներքին գործերի նախարարության տվյալները:

«Պատվաստանյութը լուծում չէ»,- ասում է թոշակառու Հելեն Վիերոնդիլսը, որը մասնակցել է մայրաքաղաքում բողոքի ակցիային:

Մարդիկ վրդովված են COVID-19-ի դեմ պատվաստումների բժշկական անցագրերի համակարգից, որը «անարդարացիորեն սահմանափակում է չպատվաստված քաղաքացիների իրավունքները»:

Օգոստոսի 28-ի երեկոյան իշխանությունները գրանցել էին 222 առանձին բողոքի ցույցեր ամբողջ երկրում, այդ թվում՝ 14.5 հազարանոց ցույց՝ Փարիզում: Բորդոյում ցուցարարներն ասել են, որ հրաժարվում են պատվաստել իրենց դպրոցական երեխաներին:

«Մենք լաբորատոր առնետներ չենք»,- վանկարկում էր 11-ամյա տղան, որը քայլում էր հոր հետ:

Նրա հոր խոսքով, որը մեջբերում է France-24-ը, ֆրանսիացիները «ապրում են ազատ երկրում, որտեղ չկան զանգվածային պատվաստումները հիմնավորող հիվանդության թվեր»: «Հարկադիր պատվաստումը ոչնչով չի տարբերվում բռնաբարությունից»,- շեշտել է նա:

Ըստ ֆրանսիական համակարգի՝ ցանկացած ոք, ով ցանկանում է հասնել ռեստորան, թատրոն, կինո, ճանապարհորդել հեռավոր գնացքներով կամ այցելել առևտրի կենտրոններ, պետք է ներկայացնի պատվաստման փաստաթուղթ կամ բացասական թեստ: Բողոքի ակցիան ավանդաբար անցկացվում է շաբաթ օրերին: Համեմատության համար օգոստոսի 21-ին 175 հազար մարդ երթով անցել է Հինգերորդ Հանրապետության փողոցներով: