Պաշտոնանկությունների միջոցով նախագահը ուղերձներ հղեց մյուսներին

Վերջին պաշտոնանկությունները ՀԱԿ-ի պահանջների հետ կապելը ԱԺ «Ժառանգություն» խմբակցության ղեկավար Ստեփան Սաֆարյանը ծիծաղելի է համարում, թեեւ ՀԱԿ-ը հրաժարականները սկսել է որակել որպես իր հաղթանակ: Սակայն նա հրաժարականները մասամբ կապում է Քոչարյանի գործոնի հետ. երբ ընտրություններից առաջ եւ ընտրությունների ընթացքում նախագահը պետք է վստահ լինի իր կողքին կանգնած մարդկանց հավատարմությանը:

Այն, որ վարչապետ Տիգրան Սարգսյանը հայտարարեց, թե ով չհամագործակցի ՀՀԿ-ի հետ, կհայտնվի կոտրած տաշտակի առջեւ, Սաֆարյանի կարծիքով, Տիգրան Սարգսյանի միտքը չէր: Պատգամավորը համոզված է, որ դա Սերժ Սարգսյանի միտքն էր` արտահայտված վարչապետի բերանով: Հայտարարությունը, բանախոսի հավաստիացմամբ, օրգանական կապի մեջ էր վերջին պաշտոնանկությունների հետ: Դրանցով նախագահն ուղերձ էր հղում համակարգի բոլոր անդամներին, թե ինչ կարող է սպասվել նրանց քաղաքական կողմնորոշումը փոխելու դեպքում: