Կապերի հաստատում ԲՈւՀ-երի եւ ավագ դպրոցների միջեւ

Ավարտվեցին  Մանուկ Աբեղյանի անվան թիվ 3 ավագ դպրոցի շենքի մի մասի վերակառուցման աշխատանքները, որոնք սկսվել  էին 2011թ-ի մայիսին:

Դպրոցի շենքը կառուցվել է 1933թ-ին եւ վերջին անգամ մասնակի վերանորոգվել էր 2003-ին:

ՀՀ ԿԳ նախարարության առաջարկով 2011թ-ի մարտ ամսին դպրոցի եւ ԵՃՇՊՀ-ի միջեւ կնքվել էր պայմանագիր: Որի համաձայն կողմերը համատեղ կազմակերպելու են ֆիզիկա, քիմիա, գծագրություն, նկարչություն առարկաների եւ լեզուների խորացված հոսքային ուսուցում:

Դպրոցի տնօրեն Սահակ Լեւոնյանն իր խոսքում նշեց, որ այս օրը պետք է համարել համագործակցության, նաեւ մտերմության օր, որի վրա պետք է կառուցել մեր երեխաների ապագան:

«Միջոցառումը վկայում է, որ Հայաստանի ավագ դպրոցների եւ առաջատար ԲՈւՀ-երի միջեւ համագործակցության նոր հնարավորությունների ստեղծման գործընթացը տալիս է իր առաջին պտուղները. ավագ դպրոցների կայացման գործում մենք հերթական հաջողությունն ենք գրանցում»,-ասաց ԿԳ նախարար Արմեն Աշոտյանը:

Նախարարն ավելացրեց, որ ՀՀ-ում ավագ դպրոցների ստեղծման ծրագրի իրականացման ընթացքում  տարբեր դժվարություններ ենք հաղթահարվել, որն է մեր հասարակությանն ու շահառուներին բացատրելը, թե ինչի համար են այս բարեփոխումները: Նրա խոսքերով ավագ դպոցի նպատակն է որպեսզի այն երեխաներն, ովքեր ուզում են ընդունվել ԲՈւՀ-եր, կարողանան ավագ դպրոցներում ստանալ որակյալ նախամասնագիտական կրթություն եւ իրենց մասնագիտական ընտրությունը կատարեն գիտակցված:

«Մենք շատ կարեւոր համարեցինք ԲՈւՀ-երի եւ ավագ դպրոցների միջեւ կապերի հաստատումը:

Ավագ դպրոցի բարեփոխումը քալյ առ քայլ առաջ է գնում` ծառայելով իր նպատակին»,-հայտարարեց Արմեն Աշոտյանը:

«Դպրոցն ընտրվել է պատահականորեն: Դպրոցի կեսն արդեն վերանորոգված է: Այն կարելի է համարել ամենալավ դպրոցներից մեկը, որն ավարտել է մեր հայրենիքի ամենա երախտավոր մարդկանցից մեկը` Անդրանիկ Մարգարյանը: Եւ դպրոցի համակարգիչներով եւ լուսավոր դասարանը կոչվելու է հենց նրա անունով: Հաջորդ դասարանանը, որը բացելու ենք, լինելու է հայտնի մաթեմաթիկոս Սամսոն Դաղաբաշյանի անվան դասարանը»,-ասաց ԵՃՇՊՀ-ի ռեկտոր Հովհաննես Թոքմաջյանը::

Նրա խոսքով ավագ դպրոցների կայացումը  միմիայն կարող է հաջողություն ունենալ, եթե ԲՈւՀ-երը լուրջ զբաղվեն այդ խնդիրներով: