ԵԽԽՎ-ն վերածվում է շահերի կազմակերպության

ԵԽԽՎ-ում հայկական  պատվիրակության ղեկավար Դավիթ Հարությունյանը այսօր լրագրողների հետ հանդիպման ժամանակ հայտարարեց, որ Հայաստանի պատվիրակությունը ԵԽԽՎ-ում 2 փաստաթուղթ է դրել շրջանառության մեջ: Նույնքան գրավոր հատարարություն է տարածել նաև Ադրբեջանի պատվիրակությունը:

Հայկական պատվիրակության ներկայացրած փաստաթղթերից մեկը` ԼՂՀ անկախության 20-ամյակի վերաբերյալ, հեղինակել է պատվիրակության անդամ, «Ժառանգության» ներկայացուցիչ Զարուհի Փոստանջյանը: Այն ստորագրել են 32 երկրների պատվիրակներ:

Մյուս փաստաթուղթը եղել է առաջարկություն, որ ԵԽԽՎ-ն բանաձև ընդունի` փոխելով իր կանոնակարգը, որում կամրագրվեն շահերի բախման բացահայտման մեխանիզմները: Դավիթ Հարությունյանը նշեց, որ  ժողովրդական խորհրդարաններում նման նորմերն ընդունված են, սակայն ԵԽԽՎ-ում դրանք բացակայում են: 

«Մեր առաջարկությունն է, որ դա գործի դրվի, քանի որ մենք կասկածում ենք,  որ այդ կազմակերպությունն արժեքների կազմակերպությունից վերածվում է շահերի կազմակերպության»,- հայտարարեց մեր պատվիրակության ղեկավարը: