Դարձյալ Րաֆֆի Հովհաննիսյան-Լեւոն Տեր-Պետրոսյան հանդիպո՞ւմ

Երբ «Ժառանգություն» կուսակցության նախագահ Րաֆֆի Հովհաննիսյանը շուրջօրյա հանրահավաքի օրերին այցելեց ՀԱԿ առաջնորդ Տեր-Պետրոսյանին, մամուլում բուռն քննարկում ծավալվեց. ոմանք դա որակեցին ՀԱԿ-ի հաղթանակ, թե, տեսեք-տեսեք, Րաֆֆին իր ոտքով է գնացել, ոմանք էլ դա պարզապես «Ժառանգություն» կուսակցության նախագահի քաղաքավարությամբ պայմանավորեցին:

Այս խոսակցությունները չէին դադարել, երբ այսօր մեջտեղ եկավ մի նոր տեղեկություն, թե շաբաթ երեկոյան Լևոն Տեր-Պետրոսյանի առանձնատանը Րաֆֆի Հովհաննիսյանն ու Տեր-Պետրոսյանը հանդիպել են, իսկ զրույցի թեման եղել են 2012-ի խորհրդարանական ընտրությունները: Ասում են, թե Տեր-Պետրոսյանը Րաֆֆի Հովհաննիսյանին խելք է սովորեցրել` ասելով, որ նա չշտապի, քանի որ մինչև դեկտեմբեր պարզ կդառնան «Ժառանգության» հետագա անելիքները` բավականին շահեկան կարգավիճակով:

Yerkir.am-ի հետ զրույցում «Ժառանգություն» կուսակցության փոխնախագահ Ռուբեն Հակոբյանը հերքեց այդ տեղեկատվությունը եւ այն որակեց «հերթական անհեթեթ ապատեղեկատվություն»:

Մեր այն հարցին, թե ո՞ւմ է ձեռնտու նման տեղեկությունների տարածումը` Հակոբյանը չպատասխանեց: Նա չցանկացավ պատասխանել նաեւ «Ժառանգություն»-ՀԱԿ հավանական համագործակցության վերաբերյալ հարցին: