ՀՅԴ-ն թարմացնում է Տեր-Պետրոսյանի հիշողությունը

Եթե Լեւոն Տեր-Պետրոսյանը լավ տիրապետեր ՀՅԴ պատմությանը, այլ վերաբերմունք կունենար Դաշնակցության նկատմամբ. այսօր մեկնաբանելով ՀԱԿ առաջնորդ Լեւոն Տեր-Պետրոսյանի հայտարարությունը, թե ինքը Դաշնակցության գործիչներից լավ է տիրապետում կուսակցության պատմությանը եւ կարող է մրցել նրանցից յուրաքանչյուրի հետ, ասաց ԱԺ ՀՅԴ խմբակցության քարտուղար Արտյուշա Շահբազյանը:

Նա հայտարարեց, թե Տեր-Պետրոսյանն արդեն սկսել է նախընտրական գործընթացները եւ  փորձում է սրբագրել իր անցյալը ու, ստեր ասելով, աղավաղել նաեւ պատմությունը:

«Նա երեւի ենթադրում է, որ իր կառավարման տարիների մարդիկ կա'մ մեռել են, կա'մ բոլորը հեռացել են Հայաստանից, կա'մ հիշողությունն են կորցրել, կա'մ այնքան երիտասարդ են, որ ոչինչ չեն հիշում»,- ասաց դաշնակցական պատգամավորը` հիշեցնելով, որ, օրինակ, 1996 թվականին հենց խորհրդարանում մարդ էին ծեծում:

«Մանրամասնորեն պատմե՞մ, թե ինչպես էին ծեծում, եւ ինչպես էր զորք տեղափոխվում Երեւան, որ մաքրեր  հրապարակները, եւ մենք, ի տարբերություն իրեն, ժողովրդին չուղարկեցինք  զորքի դեմ»,- հայտարարեց նա: